***
01.11.2026
ආර්.එෆ්.එම්.සුහෙල් – නුවරඑළිය
වැඩසටහන ආරම්භය හා සහභාගි වූවන්ගේ දර්ශන ) – https://we.tl/t-kcfoLc8UsHXjeA8Z
නාමල්ගේ අත්අඩංගුව දේශපාලන පළිගැනීමක්! – නුවරඑළිය “යුක්තිය” සම්මන්ත්‍රණයේදී පොහොට්ටුවෙන් ආණ්ඩුවට දැඩි චෝදනා
නාමල්ගේ අත්අඩංගුව දේශපාලන පළිගැනීමක්! – නුවරඑළිය “යුක්තිය” සම්මන්ත්‍රණයේදී පොහොට්ටුවෙන් ආණ්ඩුවට දැඩි චෝදනා
වත්මන් රජය සිය දේශපාලන අසාර්ථකත්වය වසා ගැනීම සඳහා දේශපාලන විරුද්ධවාදීන් ඉලක්ක කර ගනිමින් නීතිය ක්‍රියාත්මක කරන බවටත්, ශ්‍රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ මහතා අත්අඩංගුවට ගෙන රක්ෂිත බන්ධනාගාරගත කිරීම දේශපාලන පළිගැනීමක් බවටත් එම පක්ෂයේ නියෝජිතයෝ චෝදනා කළහ.
ශ්‍රී ලංකා පොදුජන පෙරමුණ විසින් සංවිධානය කරන ලද ‘යුක්තිය වෙනුවෙන් නැගිටිමු’ ජාතික සම්මන්ත්‍රණ මාලාවේ නුවරඑළිය දිස්ත්‍රික් විශේෂ සම්මන්ත්‍රණය අද (01) පෙරවරු 10.00ට නුවරඑළියේදී පැවැති අතර, එහිදී අදහස් දැක්වූ පක්ෂ නියෝජිතයෝ වත්මන් රජයේ දේශපාලන, ආර්ථික හා පාලන ක්‍රියාකලාපය දැඩි ලෙස විවේචනය කළහ.
ශ්‍රී ලංකා පොදුජන පෙරමුණේ නුවරඑළිය දිස්ත්‍රික් නායක හා ප්‍රධාන ආසන සංවිධායක නිමල් පියතිස්ස මහතාගේ ප්‍රධානත්වයෙන් පැවැති මෙම සම්මන්ත්‍රණයේදී ශ්‍රී ලංකා පොදුජන ඉංජිනේරු සංගමයේ සභාපති විජිත හේරත්, එම පක්ෂයේ අනුරාධපුර දිස්ත්‍රික් නායක හිටපු පාර්ලිමේන්තු මන්ත්‍රී ජානක තිස්සකුට්ටිආරච්චි සහ නීතිඥ සංජීව වික්‍රමරත්න යන මහත්වරු දේශන පැවැත්වූහ.
එහිදී අදහස් දැක්වූ දේශකයෝ, හොරකම් හා දූෂණවලින් තොර පාලනයක් ගොඩනඟන බවට පොරොන්දු ලබාදී බලයට පැමිණි වත්මන් පාලනයේ ප්‍රබලයන්ටම අද දූෂණ චෝදනා එල්ල වන බව පවසමින් රජයේ ක්‍රියාකලාපය ප්‍රශ්න කළහ. රජය ජනතාවගේ අපේක්ෂාවන් නියෝජනය කරන පාලනයක් නොව ඩයස්පෝරාවේ අවශ්‍යතා නියෝජනය කරන පාලනයක් බවට ද ඔවුහු චෝදනා කළහ.
එමෙන්ම රජයේ ක්‍රියාකලාපය සම්බන්ධයෙන් විවේචන ඉදිරිපත් කරනවා වෙනුවට ආණ්ඩුවට පක්ෂපාතීව කටයුතු කරන බවට ඇතැම් මාධ්‍ය ආයතනවලට චෝදනා කළ දේශකයෝ, ජනතාවට සත්‍ය තොරතුරු දැනගැනීමට ඇති අයිතිය සහ මාධ්‍යයේ ස්වාධීනත්වය පිළිබඳව ද අදහස් පළ කළහ.
නුවරඑළිය නගරයේ වත්මන් තත්ත්වය සම්බන්ධයෙන් ද දැඩි විවේචන එල්ල කළ ඔවුහු, නගරයේ සංවර්ධන කටයුතු අඩාල වී ඇති බවත්, හෝටල් හා සංචාරක ආකර්ෂණීය ස්ථාන නිසි නඩත්තුවකින් තොරව පවතින බවත් පැවසූහ. විශේෂයෙන්ම ග්‍රෙගරි වැව අවට පරිසරයේ පිරිහීම සහ සංචාරක කර්මාන්තය මුහුණ දෙන ගැටලු සම්බන්ධයෙන් නගර පාලනයේ අවධානය යොමු විය යුතු බව ඔවුහු අවධාරණය කළහ.
නුවරඑළිය මහ නගර සභාවේ පාලනය සම්බන්ධයෙන් ද චෝදනා එල්ල කළ දේශකයෝ, නගරාධිපතිවරයා ඇතුළු පිරිසකගේ ක්‍රියාකලාපය සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව වෙත පැමිණිලි ඉදිරිපත් වී ඇති බව සඳහන් කළහ. අඩු ආදායම්ලාභී ජනතාවට බෙදාදීම සඳහා ලබාදුන් අයිස්ක්‍රීම් කරත්ත නගරාධිපතිවරයාගේ නිවස ඉදිරිපිට ව්‍යාපාරික කටයුතු සඳහා යොදාගෙන ඇති බවටත්, නගර සභාවේ මුදල් අවභාවිත කර ඇති බවටත් ඔවුහු චෝදනා කළහ.
මෙම චෝදනා සම්බන්ධයෙන් අදාළ පාර්ශ්වවල ප්‍රතිචාර සම්මන්ත්‍රණයේදී ඉදිරිපත් නොවීය.
නාමල් රාජපක්ෂ මහතා සම්බන්ධයෙන් අදහස් දැක්වූ දේශකයෝ, රජයේ දූෂණ හා අක්‍රමිකතා සම්බන්ධයෙන් එල්ල වන චෝදනාවලින් ජනතා අවධානය වෙනතකට යොමු කිරීම සඳහා දේශපාලන විරුද්ධවාදීන්ට එරෙහිව නීතිය ක්‍රියාත්මක කරන බවට චෝදනා කළහ. එවැනි ක්‍රියාමාර්ග හරහා දේශපාලන පළිගැනීම් සිදු නොවිය යුතු බවත්, සියලු දෙනාටම එක හා සමානව නීතිය ක්‍රියාත්මක විය යුතු බවත් ඔවුහු අවධාරණය කළහ.
නාමල් රාජපක්ෂ මහතා අත්අඩංගුවට ගනු ලැබුවේ ශ්‍රීලන්කන් ගුවන් සේවය සඳහා ගුවන් යානා මිලදී ගැනීමේ ගනුදෙනුවකට අදාළව රුපියල් මිලියන 100ක අල්ලසක් ලබාගත් බවට එල්ල වූ චෝදනාවක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව සිදුකළ විමර්ශනයකට අදාළවය. ක්‍රිෂ් ගනුදෙනුව සම්බන්ධයෙන් ද ඔහුට වෙනම චෝදනා එල්ල වී තිබේ. එම චෝදනා සම්බන්ධයෙන් අධිකරණ ක්‍රියාමාර්ග පැවැත්වෙන අතර, චෝදනා එල්ල වීම පමණක් වරදකරු බවට පත්වීමක් නොවේ.
සම්මන්ත්‍රණයේදී දේශකයෝ වැඩිදුරටත් පෙන්වා දුන්නේ නීතියේ ස්වාධීනත්වය, යුක්තිය හා සාධාරණත්වය, රාජ්‍ය ආයතනවල ස්වාධීන ක්‍රියාකාරීත්වය සහ ජනතාවගේ ප්‍රජාතන්ත්‍රවාදී අයිතිවාසිකම් ආරක්ෂා කිරීම අත්‍යවශ්‍ය බවයි. ඒ සඳහා ජනතාව දැනුවත් කිරීමේ අරමුණින් මෙම සම්මන්ත්‍රණ මාලාව දිවයින පුරා ක්‍රියාත්මක කරන බව ද ඔවුහු සඳහන් කළහ.
