https://chat.whatsapp.com/Knsroge4upyJzBjJLvNMQS?s=cl&p=i&mlu=4&ilr=4
www.bbcmirrormedia.com
කාවන්තිස්ස ඇතාගේ මරණයට අදාළ සියලු කරුණු සොයා බැලීමට විමර්ශන – වනජීවී ප්‍රතිකාර පහසුකම් වැඩිදියුණු කිරීමටත් සැලසුම්
වනජීවී සම්පත ආරක්ෂා කිරීම සහ වනසතුන්ට අවශ්‍ය ප්‍රතිකාර පහසුකම් වැඩිදියුණු කිරීම වෙනුවෙන් රජය පියවර ගනිමින් සිටින බව කැබිනට් ප්‍රකාශක, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා ප්‍රකාශ කළේය.
අමාත්‍යවරයා මේ බව සඳහන් කළේ අද (20) රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්‍ය හමුවේදී කාවන්තිස්ස ඇතාගේ මරණය සම්බන්ධයෙන් මාධ්‍යවේදීන් නැඟූ කරුණු පිළිබඳ අදහස් දක්වමිනි.
කාවන්තිස්ස ඇතාගේ මරණය පිළිබඳ සියලු පැතිකඩ ඔස්සේ විමර්ශන
කාවන්තිස්ස ඇතාගේ මරණය සම්බන්ධයෙන් සමාජය තුළ දැඩි කනගාටුවක් හා කම්පනයක් පවතින බව සඳහන් කළ අමාත්‍යවරයා, ඇතාට ප්‍රතිකාර කිරීම සඳහා මැදිහත් වූ පශු වෛද්‍යවරුන් විශාල උත්සාහයක් ගෙන ඇති බව පැවසීය. එම වෛද්‍යවරුන්ගේ කාර්යභාරය සම්බන්ධයෙන් අනවශ්‍ය අභියෝග එල්ල කිරීම සුදුසු නොවන බව ද ඔහු පෙන්වා දුන්නේය.
සිද්ධිය සම්බන්ධයෙන් වනජීවී අමාත්‍යවරයා පාර්ලිමේන්තුවේදී කරුණු පැහැදිලි කර ඇති අතර, වනජීවී සංරක්ෂණ දෙපාර්තමේන්තුවේ අධ්‍යක්ෂ ජනරාල්වරයා ඇතුළු වගකිවයුතු පාර්ශ්ව ද අදාළ තොරතුරු ඉදිරිපත් කර තිබේ.
කෙසේ වෙතත්, ඇතාට ප්‍රතිකාර කිරීමේදී යම් ප්‍රමාදයක්, අඩුපාඩුවක් හෝ නොසැලකිල්ලක් සිදුවූයේද යන්න මෙන්ම ඇතාට වෙඩි තැබීම සම්බන්ධයෙන් ද තවදුරටත් විමර්ශන ක්‍රියාත්මක වන බව අමාත්‍යවරයා අවධාරණය කළේය.
මෙම විමර්ශනවල අරමුණ සැකකරුවන් හඳුනා ගැනීමෙන් පමණක් සීමා නොවන බවත්, මෙවැනි සිදුවීම් ඇතිවීමට බලපෑ හේතු සහ අදාළ ක්‍රියාදාමයන් හඳුනාගෙන අනාගතයේදී එවැනි සිදුවීම් වැළැක්වීමට අවශ්‍ය පියවර ගැනීම ද එහි ප්‍රධාන අරමුණක් බවත් ඔහු සඳහන් කළේය.
පශ්චාත් මරණ පරීක්ෂණය සහ විශේෂ කමිටු විමර්ශන
අධිකරණ නියෝගය අනුව කාවන්තිස්ස ඇතාගේ පශ්චාත් මරණ පරීක්ෂණය පේරාදෙණිය විශ්වවිද්‍යාලයේ පශු වෛද්‍ය අංශය වෙත යොමු කර ඇති බව අමාත්‍යවරයා පැවසීය. එම පරීක්ෂණයේ ප්‍රතිඵල ඇතුළු අදාළ තොරතුරු අධිකරණයට ඉදිරිපත් කිරීමට නියමිතය.
මීට අමතරව, වනජීවී සංරක්ෂණ දෙපාර්තමේන්තුවේ නිලධාරීන්ගේ සහභාගීත්වයෙන් තොරව එම දෙපාර්තමේන්තුව සම්බන්ධයෙන් අභ්‍යන්තර විමර්ශනයක් ද සිදු කෙරෙන බව ඔහු සඳහන් කළේය.
සිද්ධිය පිළිබඳව විධිමත් ලෙස කරුණු සොයා බැලීම සඳහා ජනාධිපතිවරයා විසින් ක්ෂේත්‍රයේ ප්‍රවීණයන්ගෙන් සමන්විත සය පුද්ගල කමිටුවක් පත් කර තිබේ. ඒ අතරම, අපරාධ පරීක්ෂණ දෙපාර්තමේන්තුව ද සිද්ධිය සම්බන්ධයෙන් විමර්ශනයක් ආරම්භ කර ඇත.
සැකකරුවන් දෙදෙනකු රක්ෂිත බන්ධනාගාරයට
කාවන්තිස්ස ඇතාගේ මරණයට අදාළ සිද්ධිය සම්බන්ධයෙන් අත්අඩංගුවට ගත් සැකකරුවන් දෙදෙනකු ඔක්තෝබර් 28 වැනිදා දක්වා රක්ෂිත බන්ධනාගාරගත කර ඇති බව අමාත්‍යවරයා වැඩිදුරටත් පැවසීය.
බස්නාහිර පළාත් අඩවි වන කාර්යාලයට මහජනතාවගෙන් ලැබුණු තොරතුරු මත අදාළ අත්අඩංගුවට ගැනීම් සිදු කර ඇති අතර, ඒ සඳහා වලාන දූෂණ මර්දන ඒකකය ද සහාය වී තිබේ.
ප්‍රධාන සැකකරුගේ නිවසේ තිබී තනි කැටයේ උණ්ඩ ඇතුළු අවි කිහිපයක් සොයාගෙන ඇති බවත්, එම සාක්ෂි මත දෙවන සැකකරු අත්අඩංගුවට ගැනීමට පියවර ගත් බවත් අමාත්‍යවරයා සඳහන් කළේය.
විමර්ශනවලදී ඉදිරියේදී අනාවරණය වන සාක්ෂි අනුව අවශ්‍ය නීතිමය ක්‍රියාමාර්ග ගනු ඇති බව ද ඔහු පැවසීය.
අනුරාධපුරයේ පශු වෛද්‍ය රෝහලක් – පොළොන්නරුවේ ඇත් අතුරු සෙවණක්
වනජීවීන්ට හදිසි ප්‍රතිකාර ලබාදීමේ හැකියාව වර්ධනය කිරීම සඳහා අනුරාධපුරයේ පශු වෛද්‍ය රෝහලක් ඉදිකිරීමට සැලසුම් කර ඇති බව අමාත්‍යවරයා පැවසීය. එහි සැලසුම් කටයුතු අවසන් කර තිබේ.
එසේම, පොළොන්නරුවේ ඇත් අතුරු සෙවණක් ආරම්භ කිරීමට ද රජය පියවර ගෙන ඇත. ලබන වසරේ මැද භාගය වන විට මෙම ව්‍යාපෘති දෙකෙහිම කටයුතු ආරම්භ කිරීමට අපේක්ෂා කරන බව ඔහු සඳහන් කළේය.
ජංගම පශු වෛද්‍ය රෝහලක් සඳහා අවශ්‍ය උපකරණ මිලදී ගැනීමේ කටයුතු ද ආරම්භ කර ඇති අතර, ඒ සඳහා අධි බලැති එක්ස් කිරණ යන්ත්‍රයක් ලබා ගැනීමට ද සැලසුම් කර තිබේ.
තවද, වනජීවී සංරක්ෂණ දෙපාර්තමේන්තුවට පශු වෛද්‍යවරුන් බඳවා ගැනීම සහ වනජීවී නිලධාරීන්ට අවශ්‍ය වාහන ඇතුළු පහසුකම් සැපයීම සඳහා ද පියවර ගනිමින් සිටින බව අමාත්‍යවරයා අවධාරණය කළේය.
වසරකට අලි මරණ 400ක් පමණ
ශ්‍රී ලංකාවේ විවිධ හේතු මත වසරකට අලි මරණ 400ක් පමණ වාර්තා වන බව අමාත්‍යවරයා සඳහන් කළේය. එම මරණ අතර ස්වාභාවික හේතු මෙන්ම මිනිස් ක්‍රියාකාරකම් හා සම්බන්ධ හේතු ද ඇතුළත් වේ.
කෙසේ වෙතත්, පසුගිය වසර දෙකක තත්ත්වය සලකා බැලීමේදී වෙඩි තැබීම්, හක්කපටස් සහ විදුලි සැර වැදීම හේතුවෙන් සිදුවන අලි මරණ සංඛ්‍යාවේ අඩුවීමක් දක්නට ලැබෙන බව අමාත්‍යවරයා පැවසීය.
කාවන්තිස්ස ඇතාගේ මරණය සම්බන්ධයෙන් සිදු කෙරෙන විමර්ශනවල ප්‍රතිඵල සහ ඒ අනුව ගනු ලබන ක්‍රියාමාර්ග පිළිබඳව ඉදිරියේදී අවධානය යොමු වනු ඇත.
වනජීවී සම්පත ආරක්ෂා කිරීම සඳහා නීතිය ක්‍රියාත්මක කිරීම පමණක් නොව, හදිසි ප්‍රතිකාර පහසුකම් ශක්තිමත් කිරීම, වගකිවයුතු ආයතනවල කාර්යක්ෂමතාව වැඩිදියුණු කිරීම සහ මෙවැනි සිදුවීම් නැවත ඇති නොවීමට අවශ්‍ය ක්‍රියාමාර්ග ගැනීම ද අත්‍යවශ්‍ය වේ.
මාධ්‍යවේදිනී: ෆාතිමා සෆාන්
www.bbcmirror.lk
www.lankawebnews.lk